സ്ഥിര മൂലധന വായ്പകൾക്കും, പ്രവർത്തന മൂലധന വായ്പകൾക്കുമുള്ള പലിശയിളവ് പദ്ധതി

കോവിഡ് 19 മഹാമാരി മൂലമുണ്ടായ സാമ്പത്തിക പ്രതിസന്ധി മൂലം വിഷമ ഘട്ടത്തിലായ സൂക്ഷ്മ- ചെറുകിട- ഇടത്തരം യൂണിറ്റുകൾക്ക് ആശ്വാസമേകാൻ പ്രഖ്യാപിച്ച പദ്ധതിയാണ് മൂലധന പ്രവർത്തന വായ്പകൾക്കുള്ള പലിശയിളവ് പദ്ധതി. ഈ പദ്ധതിയിലൂടെ 2019 ഏപ്രിൽ 1 നും, 2021 ഡിസംബർ 31 നും ഇടയിൽ, പുതുതായോ അധികമായോ, സ്ഥിര മൂലധന വായ്പയോ, പ്രവർത്തന മൂലധന വായ്പയോ എടുത്ത യൂണിറ്റുകൾക്ക് 12 മാസത്തേയ്ക്ക് പലിശയിളവ് ലഭിക്കും.

അപേക്ഷിക്കാനുള്ള അർഹത

• സംസ്ഥാനത്തെ ഉത്പാദന മേഖലയിലോ, ജോബ് വർക്ക് മേഖലയിലോ പ്രവർത്തിയ്ക്കുന്ന സൂക്ഷ്മ ചെറുകിട ഇടത്തരം യൂണിറ്റുകൾ ആയിരിക്കണം.
• ഉത്പാദനം ആരംഭിച്ച ശേഷം ഉദ്യം രജിസ്‌ട്രേഷൻ എടുത്തിരിക്കണം.
• വായ്പ അനുവദിക്കുന്ന തീയതിയ്ക്ക് മുൻപുള്ള ആറുമാസക്കാലയളവിൽ മൂന്നു മാസമെങ്കിലും യൂണിറ്റ് പ്രവർത്തിച്ചിരിയ്ക്കണം.

പദ്ധതിയുടെ ആനുകൂല്യങ്ങൾ

• സ്ഥിര മൂലധന, പ്രവർത്തന മൂലധന വായ്പകൾക്കുള്ള പലിശയിളവ് ഇനത്തിൽ ഒരു യൂണിറ്റിന് ലഭിക്കുന്ന പരമാവധി ഒറ്റത്തവണ ആനുകൂല്യം 1,20,000/- രൂപ ആയിരിക്കും.
• പുതുതായോ, അധികമായോ എടുത്ത പ്രവർത്തന മൂലധന വായ്പയുടെ പലിശയിളവായി പരമാവധി 60,000/- രൂപ ലഭിക്കും.
• പുതുതായോ, അധികമായോ എടുത്ത സ്ഥിര മൂലധന വായ്പയുടെ പലിശയിളവായി പരമാവധി 60,000/- രൂപ ലഭിക്കും.
• വായ്പയുടെ ആദ്യ ഗഡു ലഭിയ്ക്കുന്ന തീയതി മുതലുള്ള 12 മാസത്തേയ്ക്ക് യൂണിറ്റ് ബാങ്കിലേക്ക്/ ധനകാര്യ സ്ഥാപനത്തിലേക്ക് അടയ്ക്കുന്ന പലിശ തുകയുടെ 50 ശതമാനമാണ് സഹായമായി ലഭിയ്ക്കുക.
• പുതുതായോ അധികമായോ എടുത്ത/ എടുക്കുന്ന വായ്പകൾ 2019 ഏപ്രിൽ 1 നും, 2021 ഡിസംബർ 31 നും ഇടയിൽ എടുത്തതായിരിക്കണം.
• പദ്ധതിയിലൂടെ ലഭിയ്ക്കുന്ന ആനുകൂല്യം, അപേക്ഷിയ്ക്കുന്ന യൂണിറ്റിന്റെ വായ്പാ അക്കൗണ്ടിലേക്ക് അതത് ധനകാര്യ സ്ഥാപനം മുഖേന പാദവാർഷികമായി നൽകുന്നതാണ്.

 എങ്ങനെ അപേക്ഷിക്കാം

നേരിട്ടോ ഓൺലൈൻ ആയോ ഈ പദ്ധതിയ്ക്ക് അപേക്ഷിക്കാം. താലൂക്ക് വ്യവസായ ഓഫീസിലെ അസിസ്റ്റന്റ് ജില്ലാ വ്യവസായ ഓഫീസർക്കാണ് അപേക്ഷയും, അനുബന്ധ രേഖകളും നൽകേണ്ടത്.

ഓണ്‍ലൈന്‍ ആയി അപേക്ഷിക്കുന്നതിന് ഇവിടെ ക്ലിക്ക് ചെയ്യുക